Ֆրանսիայի ԱԳՆ-ն չի տեսնում Մերձավոր Արևելքում հակամարտության ավարտի կարճաժամկետ հեռանկարներ
Ֆրանսիայի արտաքին գործերի նախարար Ժան-Նոել Բարոն Թել Ավիվում Իսրայելի արտաքին գործերի նախարար Գիդեոն Սաարի հետ հանդիպումից հետո հայտնել է, որ Մերձավոր Արևելքում հակամարտության էսկալացիայից դուրս գալու ակնհայտ կարճաժամկետ ուղիներ չկան։ Նախարարը նշել է, որ չնայած իրավիճակի բարդությանը՝ Փարիզը և նրա դաշնակիցները չեն դադարեցնի ջանքերը տարածաշրջանում կայուն լուծում գտնելու ուղղությամբ։
Բարոն ընդգծել է, որ ստեղծված իրավիճակը չպետք է դառնա անգործության արդարացում։ Նախարարը նաև վերահաստատել է Ֆրանսիայի դիրքորոշումը Լիբանանի հարավում Իսրայելի հնարավոր ցամաքային գործողությունների վերաբերյալ՝ նշելով, որ Փարիզը դեմ է նման քայլերին։ Միաժամանակ Բարոն կոչ է արել լիբանանյան բանակին ձեռնարկել բոլոր անհրաժեշտ միջոցները «Հեզբոլլահ» կազմակերպության զինաթափման ուղղությամբ։
Ֆրանսիան շարունակում է հավասարակշռված դիրքորոշում պահպանել տարածաշրջանում։ Մի կողմից Փարիզը դատապարտում է Միացյալ Նահանգների և Իսրայելի կողմից իրականացվող հարվածները՝ դրանք անօրինական համարելով, մյուս կողմից՝ Իրանին մեղադրում է տարածաշրջանային անկայունության սերմանման մեջ։