Ֆիցո. Երևանում Ալիևի Եվրոպական խորհրդարանին ուղղված քննադատությունը «ինքնիշխան արտաքին քաղաքականության» օրինակ էր

Սլովակիայի վարչապետ Ռոբերտ Ֆիցոն հայտարարել է, որ Երևանում Եվրոպական քաղաքական համայնքի գագաթնաժողովի ընթացքում Ադրբեջանի նախագահի՝ Եվրոպական խորհրդարանին հասցեագրված քննադատությունը «ինքնիշխան արտաքին քաղաքականության օրինակ է»։ Ֆիցոն այդ գնահատականը տվել է պետական օդանավում նկարահանված տեսանյութում՝ Մոսկվայից հայրենիք վերադառնալիս։

Նրա խոսքով՝ «նախագահ Ալիևը ճշմարտությունն է ասել», երբ նշել է, որ Եվրոպական խորհրդարանը պետք է նախ և առաջ զբաղվի եվրոպական խնդիրներով՝ «ստեր տարածելու և այլոց գործերին խառնվելու փոխարեն»։ Սլովակիայի ղեկավարն ընդգծել է, որ նույն ուղերձն է հղում Եվրոպական խորհրդարանին Սլովակիայի անունից՝ հիշեցնելով վերջերս ընդունված «գլուխգործոցը», որով Եվրոպական հանձնաժողովին առաջարկվում է Բրատիսլավային ԵՄ ֆոնդային հատկացումներ չտրամադրել։

Ֆիցոյի այս խոսքերին X հարթակում արձագանքել է Իլհամ Ալիևը՝ շնորհակալություն հայտնելով սլովակ գործընկերոջը Ադրբեջանի մասին «ճշմարիտ և արժեքավոր» խոսքերի համար։ Տեսակապով մասնակցելով Երևանում կայացած գագաթնաժողովին՝ Ադրբեջանի ղեկավարը կրկին քննադատել էր Եվրոպական խորհրդարանն ու Եվրոպայի խորհուրդը՝ դրանք մեղադրելով «հայամետ բանաձևերի» և «սադրիչ քայլերի» համար։

Գագաթնաժողովից օրեր առաջ Եվրոպական խորհրդարանը Հայաստանի վերաբերյալ բանաձև էր ընդունել, որով դատապարտում էր «Ադրբեջանի կողմից հայ ռազմագերիների, կալանավորվածների և պատանդների անարդարացի կալանավորումը» և պահանջում նրանց անհապաղ ու անշարժապայման ազատ արձակումը։ Բանաձևում անդրադարձ կար նաև Լեռնային Ղարաբաղի հայերի վերադարձի իրավունքին, ինչպես նաև հայկական մշակութային և կրոնական ժառանգության ոչնչացման խնդրին։