Փաշինյանը «շատ կարևոր» է անվանել Մուստաֆաևի այցը Հայաստան, Աղվերանում՝ սահմանազատման 13-րդ հանդիպում
Վարչապետ Նիկոլ Փաշինյանը «շատ կարևոր» է գնահատել Ադրբեջանի փոխվարչապետ Շահին Մուստաֆաևի պաշտոնական այցը Հայաստան՝ փոխվարչապետերի փոխայցերը բնորոշելով պատմական՝ խաղաղության գործընթացի տրամաբանության մեջ։
Կաբինետի նիստից հետո լրագրողների հետ ճեպազրույցում նա ընդգծեց, որ Հայաստանի և Ադրբեջանի հարաբերությունները պետք է շարունակաբար լավարկվեն, խաղաղությունը՝ գնալով ուժեղանա, իսկ երկարաժամկետում հաստատվեն բնականոն և ռազմավարական առումով բարիդրացիական հարաբերություններ։
Փաշինյանի խոսքերով, ինքը ուրախ է, որ գործընթացը հասել է այս հանգրվանին։ Նախօրեին Հայաստան էր ժամանել ադրբեջանական պատվիրակությունը՝ փոխվարչապետ Շահին Մուստաֆաևի գլխավորությամբ։ Նա միաժամանակ Ադրբեջանի կողմից պետական սահմանի սահմանազատման հանձնաժողովի նախագահն է։
Հայաստանի արտգործնախարարության տեղեկացմամբ՝ փոխվարչապետ Մհեր Գրիգորյանի և Շահին Մուստաֆաևի նախագահությամբ տեղի է ունեցել երկու երկրների միջև պետական սահմանի սահմանազատման և սահմանային անվտանգության հարցերով հանձնաժողովի և պետական սահմանի սահմանազատման պետական հանձնաժողովի 13-րդ հանդիպումը։
Գոհունակությամբ արձանագրվել է, որ հանձնաժողովների 13-րդ հանդիպումը կրկին կայանում է կողմերից մեկի տարածքում՝ Հայաստանի Հանրապետությունում, Աղվերանում։ Հանդիպման ընթացքում կողմերը մանրամասն մտքեր են փոխանակել սահմանազատման միջոցառումների հետ կապված կազմակերպչական և տեխնիկական հարցերի շուրջ։