Սերդար Քըլըչը չի նշում, երբ կբացվի հայ-թուրքական սահմանը. խոչընդոտները՝ «զուտ տեխնիկական»
Թուրքիայի հատուկ ներկայացուցիչ Սերդար Քըլըչը Երևանում անցկացվող «Երևանյան երկխոսություն» համաժողովում հրաժարվեց նշել, թե երբ կարող է բացվել հայ-թուրքական սահմանը՝ շեշտելով, որ ներկայումս խոչընդոտները «զուտ տեխնիկական ու բյուրոկրատական են» և պետք է կարգավորվեն։
Քըլըչի խոսքով՝ համաժողովում սահմանը բացելու հարցը չեն քննարկել. «Որոշել ենք, որ երբ ճիշտ ժամանակը գա, երբ ձևակերպումները վերջնական տեսքի բերվեն, կբացենք սահմանը»,— ասաց նա։ Դիվանագետը հավելեց, որ Ալիջանի անցակետի շինարարությունը «գրեթե պատրաստ է», սակայն դեռ պետք է ավարտին հասցվեն մի շարք հարցեր՝ գործադիր անձնակազմի նշանակումը, ինտերնետային կապի ապահովումը և այլ գործնական քայլեր։
«Մենք մեր քաղաքական կամքը հայտնել ենք դեռ 2022 թվականի օգոստոսին»,— նշեց Քըլըչը՝ միաժամանակ ընդգծելով, որ չի կարող կանխատեսել սահմանը բացելու ժամկետը և «չի ցանկանում սխալ տեղեկություն տալ»։ Դիվանագիտական գործընթացի հաջորդ քայլերը, ըստ Քըլըչի, կախված են տեխնիկական և բյուրոկրատական ընթացակարգերի ավարտից, ինչպես նաև համաձայնեցվող ձևակերպումների վերջնականեցումից, ինչը դեռևս թույլ չի տալիս ասել հստակ օրացույցի մասին։