«Ուժեղ Հայաստան»-ին վերագրվող նոր ընտրակաշառքի գործ. Հակակոռուպցիոնը սկսել է վարույթ, կան ձերբակալվածներ
Հակակոռուպցիոն կոմիտեն հայտարարում է «Ուժեղ Հայաստան» կուսակցությանը վերագրվող հերթական ընտրակաշառքի գործի մասին։ Մարմնի տեղեկացմամբ՝ դեպքի առթիվ նախաձեռնվել է քրեական վարույթ, մի շարք անձինք ձերբակալվել են, կատարվել են խուզարկություններ։ Միաժամանակ Հակակոռուպցիոնը չի բացահայտում, թե քանի անձ է ձերբակալվել և ովքեր են նրանք։
Ըստ հաղորդագրության, փաստական տվյալներ են ստացվել, որ «Ուժեղ Հայաստան»-ի Շիրակի մարզի Անի համայնքի տարածքային պատասխանատուն, իր մերձավոր ազգականների և այլ անձանց հետ, հունիսի 7-ին կայանալիք ԱԺ ընտրություններին կուսակցության օգտին քվեարկելու պայմանով մի շարք ընտրողների խոստացել, ինչպես նաև տվել են ընտրակաշառք։
Այդ գումարները ներկայացվել են որպես աշխատավարձ՝ ընտրողներիը կուսակցության տարածքային գրասենյակներում պատասխանատու կամ ակտիվիստ ձևակերպելու անվան տակ։
Իրավապահների պնդմամբ, «Ուժեղ Հայաստան» կուսակցության անունից հանդես եկող անձը նաև փորձել է խոչընդոտել մի շարք քաղաքացիների ընտրական իրավունքի ազատ իրականացումը՝ նրանց նյութապես շահագրգռելու, ինչպես նաև քրեական աստիճանակարգության բարձրագույն կարգավիճակ ունեցող անձանց անունից հնչեցված սպառնալիքների միջոցով։
Չնայած օր օրի ավելացող քրեական գործերին, Սամվել Կարապետյանը նախօրեին հերքել է գումար բաժանելու մասին իրավապահների պնդումները։