Մոսկվայի մայիսի 9-ի շքերթը կանցնի առանց ռազմական տեխնիկայի՝ «ընթացիկ օպերատիվ իրավիճակի» պատճառով
Մոսկվայի մայիսի 9-ի ավանդական զորահանդեսը այս տարի կանցնի առանց ռազմական տեխնիկայի։ Այս մասին հայտնել է Ռուսաստանի պաշտպանության նախարարությունը՝ որոշումը բացատրելով «ընթացիկ օպերատիվ իրավիճակով»։ Նույն հիմնավորմամբ Կարմիր հրապարակով այս անգամ չեն անցնի նաև Սուվորովյան և Նախիմովյան ռազմական ուսումնարանների սաները, ինչպես նաև կադետական կորպուսների ներկայացուցիչները։
Միևնույն ժամանակ, ըստ նախարարության, շքերթին նախատեսվում է ռազմական ավիացիայի մասնակցություն։ Վերջին ամիսներին, Ռուսաստանի բանակի հարվածներին պատասխանելով, Ուկրաինան անօդաչու թռչող սարքերով հարձակումներ է իրականացրել ՌԴ տարբեր շրջանների ենթակառուցվածքային օբյեկտների վրա, այդ թվում՝ Բալթիկ ծովի նավահանգիստների և Տուապսեի նավթավերամշակման գործարանի ուղղությամբ։
Այս զարգացումները կազմում են այն ֆոնը, որի մասին խոսելիս ռուսական կողմը նշում է օպերատիվ սահմանափակումներ։ Սոցիալական ցանցերում օգտատերերը վերջին շաբաթներին ենթադրում էին, որ մայիսի 9-ի շքերթը կարող է կամ չկայանալ, կամ էլ զգալիորեն կրճատվել՝ Ուկրաինայի կողմից հնարավոր հարձակման սպառնալիքի պատճառով։
Պաշտպանության նախարարության հայտարարությունը հաստատում է, որ այս տարվա միջոցառումը անցնելու է սահմանափակված ձևաչափով։