Ինֆանտինոն հայտարարեց, որ Իրանն կմասնակցի 2026-ի ԱՇ-ին և կխաղա ԱՄՆ-ում, Թրամփը ասաց՝ համաձայն է
ՖԻՖԱ-ի նախագահ Ջանի Ինֆանտինոն Վանկուվերում կայացած ֆեդերացիայի կոնգրեսում հայտարարեց, որ Իրանը կմասնակցի 2026 թվականի ՖԻՖԱ-ի աշխարհի առաջնությանը և կխաղա Ամերիկայի Միացյալ Նահանգներում։ «Իհարկե, Իրանը կմասնակցի 2026 թվականի ՖԻՖԱ-ի աշխարհի առաջնությանը։ Եվ, իհարկե, Իրանը կխաղա Ամերիկայի Միացյալ Նահանգներում»,— ասաց Ինֆանտինոն՝ հավելելով.
«Պատճառը շատ պարզ է, մենք պետք է միավորվենք։ Դա իմ պատասխանատվությունն է, մեր պատասխանատվությունը»։ ԱՄՆ նախագահ Դոնալդ Թրամփը, արձագանքելով Իրանի մասնակցության մասին հայտարարությանը, նշել է. «Եթե Ինֆանտինոն է դա ասել, ապա ես համաձայն եմ դրա հետ»։ Իրանը որակավորվել է մրցաշարին, սակայն Թեհրանը խնդրել էր խմբային փուլի խաղերը ԱՄՆ-ից տեղափոխել Մեքսիկա։
ՖԻՖԱ-ն, սակայն, մերժել էր այդ դիմումը։ Ավելի վաղ ԱՄՆ պետքարտուղար Մարկո Ռուբիոն հայտարարել էր, որ ԱՄՆ կառավարությունը դեմ չէ Իրանի հավաքականի մասնակցությանը 2026 թվականի ՖԻՖԱ-ի աշխարհի առաջնությանը՝ չնայած երկու երկրների միջև հակամարտությանը։
«ԱՄՆ-ից որևէ կերպ չի ասվել, թե նրանք չեն կարող գալ»,— ասել էր Ռուբիոն՝ ընդգծելով, որ Իրանի հավաքականի հետ ԱՄՆ չեն կարողանա ճամփորդել այն անձինք, ովքեր կապեր ունեն Իրանի Իսլամական հեղափոխության պահապանների կորպուսի (ԻՀՊԿ) հետ։ «Իրանի հետ խնդիրը նրանց մարզիկները չեն։
Խնդիր կլինեն այն մարդիկ, որոնց նրանք կցանկանան բերել իրենց հետ։ Նրանցից մի քանիսը կապեր ունեն ԻՀՊԿ-ի հետ։ Մենք գուցե չկարողանանք նրանց թույլ տալ մուտք գործել, բայց ոչ մարզիկներին»,— ավելացրել էր պետքարտուղարը։ ՖԻՖԱ-ի և ԱՄՆ պաշտոնյաների հայտարարությունները հաստատում են, որ ընթացիկ պլանավորումները նախատեսում են Իրանի մասնակցությունը, մինչդեռ մուտքի սահմանափակումների հարցերը կարող են առանձին կարգավորվել իրավասու մարմինների կողմից։