Թուրքիան հերքում է հունիսի 4-ին ՀՀ սահմանը բացելու մասին հրապարակումները, ժամկետ դեռ չի սահմանվել
Թուրքիայի արտաքին գործերի նախարարության աղբյուրները հերքել են լրատվամիջոցներում տարածված տեղեկությունները, ըստ որոնց Հայաստանի հետ սահմանային անցակետի բացումը նախատեսվում է հունիսի 4-ին։ Աղբյուրների խոսքով՝ սահմանը բացելու հստակ ժամկետ այս պահին որոշված չէ։ Անկարայի դիվանագիտական շրջանակների փոխանցմամբ՝ Հայաստանի հետ հարաբերությունների կարգավորման գործընթացը շարունակվում է արդեն չորս տարի։
Այդ ընթացքում իրականացվել են վստահության ամրապնդման մի շարք քայլեր՝ ընդգրկելով տրանսպորտի, մշակույթի, առևտրի և կրթության ոլորտները։ Նույն աղբյուրների տվյալներով՝ սահմանի հարցով նույնպես ընթանում են նախապատրաստական աշխատանքներ։ Որոշումների ընդունման դեպքում դրանք, ըստ նրանց, հնարավորինս արագ կյանքի կկոչվեն, սակայն սահմանային անցակետերի բացման որևէ ժամանակացույց առայժմ չկա։
Ավելի վաղ թուրքական մամուլում առկա հրապարակումները պնդում էին, թե սահմանային անցակետի բացումը ծրագրվում է հունիսի 4-ին, սակայն Անկարայի վերջին մեկնաբանությունները այդ ժամկետը չեն հաստատում։ Աղբյուրները նաև ընդգծում են, որ Հայաստանի և Ադրբեջանի միջև խաղաղության համաձայնագրի ստորագրումից հետո Թուրքիայի և Հայաստանի միջև գործընթացը, իրենց գնահատմամբ, նոր թափ կստանա։
Մինչ այդ, սահմանը բացելու վերաբերյալ կոնկրետ ժամկետ չի սահմանվել։