Թեհրանում գիշերը ակտիվացվել են ՀՕՊ համակարգերը, հայտնում են իրանական ԶԼՄ-ները
Թեհրանի երկնքում գիշերը գործի դրվեցին հակաօդային պաշտպանության համակարգերը՝ ենթադրյալ անօդաչու թռչող սարքերի գործողություններին արձագանքելով։ Մայրաքաղաքի մի շարք կետերում լսվել են ՀՕՊ կրակի ձայներ, հայտնում են իրանական լրատվամիջոցները։ Ըստ կիսապաշտոնական Tasnim և Fars գործակալությունների՝ քաղաքում լսված ՀՕՊ գործողությունը տևել է մոտ 20 րոպե։
Նշված աղբյուրների համաձայն՝ համակարգերը թիրախավորում էին «փոքր ինքնաթիռներ և հետախուզական անօդաչու թռչող սարքեր»։ Ի սկզբանե հստակ չէր, թե արդյոք դա իրանական վարժանք էր, թե իրական արձագանք։ Ավելի ուշ լրատվամիջոցները հաղորդեցին, որ ՀՕՊ-ը կիրառվել է օդային օբյեկտների դեմ՝ չմանրամասնելով դրանց ծագման կամ խոցման վերաբերյալ տեղեկությունները։
Հաղորդվում է, որ կրակոցները դադարել են մոտ 20 րոպե անց, և իրավիճակը մայրաքաղաքում վերադարձել է բնականոն ընթացքի։ Տուժածների կամ վնասների մասին հաղորդումներ չկան։ Նշվում է, որ Իրանի դեմ ամերիկա-իսրայելական ավիահարվածները մեկնարկել էին փետրվարի 28-ին, իսկ ապրիլի 8-ին Վաշինգտոնը և Թեհրանը համաձայնել էին հրադադար հաստատել։