Զելենսկին և Ալիևը հեռախոսազրույց են ունեցել. քննարկվել է Բաքվում համաձայնեցված քայլերի իրականացումը
Ուկրաինայի և Ադրբեջանի նախագահներ Վլադիմիր Զելենսկին և Իլհամ Ալիևը հեռախոսազրույց են ունեցել։ Զելենսկին X-ում գրեց, որ քննարկվել է մի քանի շաբաթ առաջ իր Բաքու կատարած այցի ընթացքում կողմերի միջև համաձայնեցված քայլերի իրականացումը։
Նրա խոսքով՝ Կիևն ու Բաքուն շարունակում են աշխատել ոչ միայն երկկողմ հարաբերությունների զարգացման, այլև տարածաշրջանի այլ երկրների հետ համագործակցության ուղղությամբ՝ անվտանգությունն ու կայունությունը ամրապնդելու նպատակով։ Զանգը կայացել է օրեր անց այն բանից հետո, երբ Զելենսկին Հայաստան էր այցելել՝ մասնակցելու Երևանում անցկացված Եվրոպական քաղաքական համայնքի 8-րդ գագաթնաժողովին։
Այցի ընթացքում նա հանդիպել էր վարչապետ Նիկոլ Փաշինյանին։ Կողմերը, ըստ հրապարակված տեղեկատվության, քննարկել են Հայաստան–Ուկրաինա երկկողմ փոխգործակցության զարգացման հեռանկարները, անդրադարձել տարածաշրջանային և գլոբալ զարգացումներին՝ ընդգծելով կայուն ու տևական խաղաղության առաջմղման անհրաժեշտությունը։
Զելենսկին նշել էր, որ առաջարկել է վերսկսել Տնտեսական համագործակցության միջկառավարական համատեղ հանձնաժողովի աշխատանքը և դրա հաջորդ նիստը անցկացնել այս տարի Կիևում։ Մինչ Երևան ժամանելը Ուկրաինայի նախագահը այցելել էր Ադրբեջան, որտեղ առաջարկել էր Բաքուն դիտարկել որպես ռուս-ուկրաինական բանակցությունների հարթակ։
Մոսկվան, սակայն, մերժել է այս առաջարկը։ Ադրբեջանի նախագահ Իլհամ Ալիևը նույնպես տեղեկացրել է հեռախոսազրույցի մասին՝ նշելով, որ նախօրեին իրեն էր զանգահարել Ուկրաինայի առաջնորդը։ Նրա հրապարակման համաձայն՝ քննարկվել են երկկողմ հարաբերությունները, և «հեռախոսազրույցի ընթացքում գոհունակությամբ նշվեց մեր երկրների միջև հարաբերությունների զարգացման դրական դինամիկան»։
Ըստ պաշտոնական հաղորդումների, կողմերը կենտրոնանում են երկկողմ կապերի վրա և տարածաշրջանային համագործակցության ընդլայնման ուղղությամբ, ինչը, նրանց ձևակերպմամբ, միտված է անվտանգության և կայունության ամրապնդմանը։