Զելենսկին՝ Ռուսաստանը չի պատրաստվում ավարտել պատերազմը, դրոնային հարձակումներն ապացուցում են
Ուկրաինայի նախագահ Վոլոդիմիր Զելենսկին Ռուսաստանի վերջին զանգվածային դրոնային հարձակումները որակել է որպես Մոսկվայի՝ պատերազմը շարունակելու անմիջական ապացույց։ Նրա խոսքով՝ հարձակման մասշտաբը հստակ ցույց է տալիս, որ Ռուսաստանը չունի պատերազմն ավարտելու իրական մտադրություն։
«Այս հարձակման մասշտաբը շատ հստակ վկայում է, որ Ռուսաստանը չունի պատերազմը ավարտելու որևէ իրական մտադրություն։ Եթե հաշվի առնենք նաև, որ Ռուսաստանը օգնում է իրանական ռեժիմին հարվածներ հասցնել տարածաշրջանում, ապա եզրակացությունը ակնհայտ է՝ առանց լրացուցիչ և ուժեղ ճնշման Ռուսաստանի վրա, առանց զգալի կորուստների, Մոսկվայում չի առաջանա խաղաղությանը վերադառնալու ցանկություն»,— հայտարարել է Զելենսկին։
Երեքշաբթի ցերեկը Ռուսաստանը կամիկաձե տիպի անօդաչու սարքերի միջոցով զանգվածային հարձակում է իրականացրել Ուկրաինայի գրեթե ողջ տարածքի վրա։ Լվովում վիրավորվել է ավելի քան 20 մարդ, իսկ «Շահեդ» տիպի դրոնը խոցել է XVI դարի բերնարդինյան վանքը։ Սովորաբար նման հարձակումները տեղի են ունենում գիշերային ժամերին, ինչի կապակցությամբ ուկրաինացի փորձագետները ենթադրում են, որ խոսքը ռուսական բանակի նոր մարտավարության մասին է։
Զելենսկին ընդգծել է, որ Ռուսաստանի գործողությունները ոչ միայն Ուկրաինայի, այլև տարածաշրջանի անվտանգության համար լուրջ սպառնալիք են ներկայացնում։ Նա կոչ է արել միջազգային հանրությանը ուժեղացնել ճնշումը Մոսկվայի վրա՝ պատերազմը դադարեցնելու և կայուն խաղաղություն հաստատելու նպատակով։