Երևանում՝ ԵՄ–Հայաստան առաջին գագաթնաժողովը մայիսի 4-5-ին. նախատեսվում են քայլեր անվտանգության և պաշտպանության ոլորտում
Երևանը մայիսի 4-5-ին կհյուրընկալի ԵՄ–Հայաստան առաջին գագաթնաժողովը, որը, ըստ Հայաստանում Եվրոպական միության պատվիրակության հրապարակման, նշանակալի քայլ է երկկողմ հարաբերություններում՝ վերահաստատելով ԵՄ-ի ամուր հանձնառությունը Հայաստանի ինքնիշխանությանը, դիմադրողականությանը և բարեփոխումների օրակարգին։
Գագաթնաժողովին կմասնակցեն Եվրոպական միությունը ներկայացնող նախագահ Ուրսուլա ֆոն դեր Լայենը և նախագահ Անտոնիո Կոստան, ինչպես նաև Հայաստանը ներկայացնող վարչապետ Նիկոլ Փաշինյանը։ Մասնակցելու է նաև ԵՄ բարձր ներկայացուցիչ Կայա Կալլասը։
Առաջնորդները կհամապատասխանեցնեն դիրքորոշումները երկկողմ հարաբերություններում վերջին շրջանում գրանցված առաջընթացի շուրջ և կփորձեն խորացնել համագործակցությունը՝ հատկապես տնտեսության, տրանսպորտային ենթակառուցվածքների և անվտանգության ոլորտներում։ Քննարկվելու են նաև Հարավային Կովկասում կայունության և կայուն աճի ամրապնդմանն ուղղված համատեղ ջանքերը։
Օրակարգում կլինեն տարածաշրջանային և գլոբալ զարգացումներ, այդ թվում՝ Ուկրաինայում և Մերձավոր Արևելքում տեղի ունեցող գործընթացները։ Ըստ ԵՄ պատվիրակության՝ երկու կողմերն էլ կոնկրետ քայլեր կձեռնարկեն անվտանգության և պաշտպանության ոլորտում համագործակցությունը խորացնելու ուղղությամբ, այդ թվում՝ Հայաստանում ԵՄ նոր գործընկերային առաքելության ստեղծման միջոցով։