ԱՄՆ պաշտոնյա. Թրամփը դժգոհ է Իրանի առաջարկից՝ երկամսյա պատերազմը դադարեցնելու վերաբերյալ
Դոնալդ Թրամփը դժգոհ է Իրանի կողմից ներկայացված փաթեթից, որը միտված է երկամսյա պատերազմը դադարեցնելուն։ Այդ մասին ասել է ամերիկացի մի պաշտոնյա՝ նշելով, որ առաջարկը չի համապատասխանում Վաշինգտոնի առաջնահերթություններին։ Ամերիկյան լրատվամիջոցների հաղորդմամբ, Թեհրանը պակիստանցի միջնորդների միջոցով փոխանցել է ԱՄՆ-ին առաջարկ՝ վերաբացել Հորմուզի նեղուցը և ավարտել փետրվարի 28-ին սկսված պատերազմը։
Նույն տեղեկության համաձայն՝ առաջարկվել է միջուկային ծրագրի շուրջ հարցերը տեղափոխել ավելի ուշ փուլ։ Պաշտոնյան ընդգծել է, որ դա, ամենայն հավանականությամբ, չի բավարարի Միացյալ Նահանգներին, որոնք պնդում են՝ միջուկային հարցերը պետք է քննարկվեն հենց սկզբից, և հենց այդ պատճառով էլ նախագահը դժգոհ է առաջարկից։
Սպիտակ տան խոսնակ Քերոլայն Լևիթը հաստատել է, որ ապրիլի 27-ին նախագահը հանդիպում է անցկացրել իր ազգային անվտանգության ավագ թիմի հետ՝ քննարկելու Իրանի նոր առաջարկը։ «Միայն այն պատճառով, որ դրա մասին հաղորդվել է, կհաստատեմ, որ նախագահը այսօր առավոտյան հանդիպել է իր ազգային անվտանգության թիմի հետ»,— ասել է Լևիթը՝ հավելելով, որ հանդիպումը «հնարավոր է շարունակվի»։
Նրա խոսքով՝ Իրանի վերաբերյալ նախագահի «կարմիր գծերը» հստակ են հայտարարվել, սակայն այլ մանրամասներ նա չի ներկայացրել։ ԱՄՆ պետքարտուղար Մարկո Ռուբիոն նույնպես հաստատել է, որ Վաշինգտոնը ստացել է նոր առաջարկը։ Նրա գնահատմամբ՝ Իրանի ղեկավարությունը «լրջորեն է տրամադրված» խաղաղության համաձայնագիր կնքելուն՝ մեծ տնտեսական ճնշման և արդյունաբերական ու ռազմական կարողությունների պակասի պայմաններում։
Պաշտոնական Թեհրանը, իր հերթին, շարունակում է դիվանագիտական կապերը։ Իրանի ԱԳ նախարար Աբբաս Արաղչին օրերս այցելել է Օման, ապա երկուշաբթի օրը եղել է Ռուսաստանում, որտեղ հանդիպել է նախագահ Վլադիմիր Պուտինի հետ և ստացել իր երկարամյա դաշնակցի աջակցության խոսքերը։ Առայժմ հստակ չէ, թե երբ և ինչ ձևաչափով կարող են շարունակվել քննարկումները, սակայն Վաշինգտոնում նշում են, որ գործընթացը դեռ ընթացքի մեջ է։