Meta-ն նախատեսում է AI-ով բացահայտել անչափահասների հաշիվները և հեռացնել մինչև 13 տարեկաններին
ԱՄՆ տեխնոլոգիական հսկա Meta ընկերությունը նախատեսում է օգտագործել արհեստական բանականություն՝ օգտատերերի տարիքը ստուգելու և մինչև 13 տարեկան երեխաներին իր հարթակներից հեռացնելու համար։ AI-ով աշխատող համակարգը կգործի Facebook, Instagram, Threads և WhatsApp ծառայություններում։
Ընկերության տվյալներով, համակարգը վերլուծելու է ոչ միայն տեքստային տվյալները, այլև պատկերների, մեկնաբանությունների և տեսանյութերի (reels) բովանդակությունը։ Meta-ն նշում է, որ եթե ալգորիթմը հայտնաբերի, օրինակ, փուչիկներ կամ 11-ամյակի տորթի պատկեր, հաշիվը կդիտարկվի որպես երեխայի հաշիվ և կջնջվի։
Տուժած օգտատերերը կկարողանան վիճարկել որոշումը՝ իրենց տարիքը հաստատելով անձնագրով կամ այլ պաշտոնական փաստաթղթերով։ Ընկերությունը նախատեսում է AI կիրառել նաև մինչև 17 տարեկան այն դեռահասներին հայտնաբերելու համար, որոնք իրենց ներկայացրել են որպես մեծահասակ։ Այդ դեպքերում համակարգը կվերլուծի վարքային տվյալներ, օրինակ՝ ինչ հաշիվների են հետևում նրանք։
Եվրոպական հանձնաժողովը վերջերս մեղադրել է Meta-ին՝ երիտասարդներին բավարար չափով չպաշտպանելու համար։ Բրյուսելը պահանջում է, որ Instagram-ը և Facebook-ը ապահովեն նվազագույն 13 տարեկան սահմանը, հակառակ դեպքում սպառնում է խոշոր տուգանքներով։ Ավելի երկարաժամկետ հեռանկարում հանձնաժողովը պահանջում է, որ բոլոր սոցիալական ցանցերը օգտագործեն ԵՄ-ի միասնական հավելված՝ տարիքային ստուգման համար։
Միաժամանակ ԵՄ մի շարք երկրներում՝ Ավստրիայում, Ֆրանսիայում և Իսպանիայում, քննարկվում է մինչև որոշակի տարիք (15 կամ 16) սոցիալական ցանցերի լիակատար արգելք, իսկ Ավստրալիան արդեն ներդրել է նման արգելք։