Ֆինլանդիան միացավ Ուկրաինայի դեմ ագրեսիայի հանցագործության հարցով Հատուկ տրիբունալ ստեղծելու համաձայնագրին
Ֆինլանդիան պաշտոնապես միացել է Ուկրաինայի դեմ ագրեսիայի հանցագործության հարցով Հատուկ տրիբունալ ստեղծելու համաձայնագրին՝ դառնալով նախաձեռնությանը միացած 21-րդ պետությունը։ Այս մասին X-ում հայտնել է Ուկրաինայի արտաքին գործերի նախարար Անդրեյ Սիբիհան՝ հավելելով, որ Կիևը սպասում է, թե միացողների թիվը կշարունակի աճել։
Սիբիհայի խոսքով՝ համաձայնագիրը մի քանի շաբաթից կդրվի քվեարկության Եվրոպայի խորհրդի նախարարների կոմիտեի նիստում, որը տեղի կունենա Մոլդովայի մայրաքաղաք Քիշնևում։ Նա ընդգծել է, որ գործընթացին հրավիրված են բոլոր պետությունները, ոչ միայն եվրոպականները. նրա ձևակերպմամբ՝ աշխարհագրությունը նշանակություն չունի, երբ խոսքը միջազգային իրավունքի նկատմամբ հարգանքի և արդարության անհրաժեշտության մասին է։
Տրիբունալի կանոնադրությունը նախատեսում է ինչպես անձնական ներկայությամբ, այնպես էլ հեռակա դատավարություններ։ Մեղադրական վճռի դեպքում կարող են սահմանվել մինչև 30 տարվա ազատազրկում, իսկ առավել ծանր դեպքերում՝ ցմահ ազատազրկում։ Կանոնադրությունը նաև նախատեսում է գույքի բռնագրավում և տուգանքներ, որոնցից ստացված միջոցները պետք է փոխանցվեն Ուկրաինայում ռուսական ագրեսիայի զոհերի փոխհատուցման հիմնադրամին։
Ուկրաինայի նախագահի Վլադիմիր Զելենսկու և Եվրոպայի խորհրդի գլխավոր քարտուղար Ալեն Բերսեի միջև տրիբունալ ստեղծելու համաձայնագիրը ստորագրվել էր անցյալ տարվա հունիսի 25-ին։ Սիբիհան նախաձեռնությունը բնորոշել է որպես պատմական և կոչ արել երկրների միանալ՝ այն իրականություն դարձնելու համար։