Ջերմուկում հայտնաբերված Կարմիր գրքի գորշ արջի երկու քոթոթները տեղափոխվել են ապաստարան
Ջերմուկ քաղաքում ճանապարհի բարձրացված հատվածի հենապատի վրա հայտնաբերված գորշ արջի երկու քոթոթները տեղափոխվել են ապաստարան՝ այն բանից հետո, երբ 2026 թվականի մայիսի 4-ին, ժամը 13:00-ի սահմաններում Բնապահպանության և ընդերքի տեսչական մարմինը ահազանգ ստացել է ՀՀ ՆԳՆ համայնքային ոստիկանության գլխավոր վարչության Ջերմուկի բաժնից։
Տեսչական մարմնի աշխատակիցների անհապաղ արձագանքի արդյունքում դեպքի վայրում պարզվել է, որ անօգնական վայրի կենդանիները ՀՀ Կարմիր գրքում գրանցված գորշ արջի մոտ մեկ ամսական քոթոթներ են։ Արտաքին զննությամբ նրանց մոտ վնասվածքներ չեն հայտնաբերվել։
Քոթոթների պատշաճ խնամքն ապահովելու և հետագայում նրանց վայրի բնություն վերադարձնելու նպատակով կենդանիները տեղափոխվել են Վայրի բնության և մշակութային արժեքների պահպանման հիմնադրամի (FPWC) Ուրցաձորի կովկասյան կենսաբազմազանության ապաստարան։ Տեսչական մարմինը նշել է, որ հետագա քայլերը նպատակաուղղված են կենդանիների անվտանգության ապահովմանը և դրանց բնական միջավայր վերադառնալու հնարավորության պահպանմանը։