Պետությունը շարունակելու է աջակցել հայ կինոյի զարգացմանը. ԿԳՄՍ նախարար Ժաննա Անդրեասյան
Հայ կինոյի օրվա կապակցությամբ ԿԳՄՍ նախարար Ժաննա Անդրեասյանը հայտարարեց, որ պետությունը շարունակելու է աջակցել հայ կինոյի զարգացմանը՝ խրախուսելով ստեղծագործական նոր գաղափարները, միջազգային համագործակցությունը և երիտասարդ տաղանդների առաջխաղացումը։ Նա ընդգծեց, որ ընթացքի մեջ գտնվող հիմնային բարեփոխումները դրա վկայությունն են։
Նախարարը նշեց, որ կինեմատոգրաֆը միայն արվեստ չէ, այլ նաև ժողովուրդների պատմության, հոգևոր արժեքների և ինքնության արտացոլում, որը կամրջում է տարբեր մշակույթներ։ Նա վերանայեց հայ կինոյի մեկդարյա ուղին՝ ընդգծելով, որ պահպանելով ավանդույթները այն շարունակում է զարգանալ և հեղինակավոր հարթակներում արժանանալ մրցանակների՝ հաստատելով ստեղծարար ներուժի մրցունակությունը։
Անդրեասյանը կարևորեց նաև կինոժառանգության պահպանումը և մեծանուն կինոգործիչների հիշատակը, ինչպես նաև շնորհեց գնահատանք մեր օրերի ստեղծագործողներին, որոնք նոր շունչ ու ժամանակակից մտածողություն են բերում ոլորտ։
Նրա խոսքով՝ առանձնակի հիշատակման են արժանի երկու ուղղություն՝ ֆիլմարտադրության ոլորտում ներդրումների մասնակի վերադարձի գործիքը և «Համո Բեկնազարյանի անվան «Հայֆիլմ» կինոստուդիա» ՓԲ ընկերության հարյուր տոկոս պետական սեփականություն հանդիսացող բաժնետոմսերի կառավարման լիազորությունները ԿԳՄՍ նախարարությանը վերապահելու որոշումները։
Այս քայլերը, ըստ նախարարի, նոր ուղի են բացում կինեմատոգրաֆիայի պատմության մեջ՝ խոստանալով լավագույն հեռանկարներ։ Ֆիլմարտադրության ոլորտում ներդրումների մասնակի վերադարձի ծրագրով ներկայացվել է 10 հայտ՝ 1.4 մլրդ դրամ ծավալով, որոնցից 6-ը հաստատվել է։ Նախարարության դրամական խրախուսման ծրագրով միայն 2025 թ.
հայ կինոգործիչները մասնակցել են 17 միջազգային հեղինակավոր կինոփառատոների, իսկ միջազգային հարթակներին մասնակցության ծախսերի փոխհատուցմամբ՝ 16 ստեղծագործողի տրամադրվել է աջակցություն 11 միջազգային կինոհարթակների մասնակցության համար։ Շնորհավորական ուղերձում Անդրեասյանը ցանկացավ ոլորտի ներկայացուցիչներին անսպառ եռանդ, նոր մտահղացումներ, լեցուն դահլիճներ և նոր հաղթանակներ՝ շեշտելով, որ նրանք դեռ շատ ասելիք ունեն՝ նոր սցենարներով ու ֆիլմերով։