«Չկա որևէ ուժ, որ կարող է ինձ ունեզրկել». Սամվել Կարապետյանը պատասխանեց Փաշինյանին
«Չկա որևէ ուժ, որ կարող է ինձ ունեզրկել», հայտարարեց «Ուժեղ Հայաստան» կուսակցության առաջնորդ, միլիարդատեր Սամվել Կարապետյանը՝ անդրադառնալով վարչապետ Նիկոլ Փաշինյանի խոսքերին: Վարչապետը ապրիլին լրագրողների հետ ճեպազրույցում ասել էր, որ վախենում է՝ Կարապետյանը կարող է կորցնել ամբողջ ունեցվածքը։
Փաշինյանի խոսքով՝ այդ վախը կապվում է Կարապետյանի կողմից որոշ շրջանակներին, այդ թվում՝ Հայաստանից դուրս գտնվող, տրված խոստումների հետ, որոնք «որոշակի լծակներ ունեն նաև նրա ունեցվածքի» նկատմամբ։ Նա հավելել էր, որ իր գնահատմամբ ակնհայտ է՝ պարտավորությունները չեն կատարվելու, և «այդ ամբողջ ունեցվածքը նրա ձեռքից վերցվելու է», ինչի համար «շատ է ցավում», քանի որ չէր ուզենա, որ որևէ տեղ հայկական համարվող կապիտալ «զրոյացվեր»։
Հարցին, թե պարտության դեպքում իրենց ցուցակի ընտրված պատգամավորները մանդատնե՞րն են հանձնելու, Կարապետյանը հստակ պատասխան չտվեց՝ փոխարենը պնդելով, որ ընտրություններից հետո վարչապետը լինելու է ինքն։ Նա նաև հայտարարեց, թե Փաշինյանն ունի 25 տոկոսի հասնող վարկանիշ. «Դրա համար մենք հիմա գնում ենք ընտրությունների օրինական ճանապարհով, թույլ չտալով ոչ մի ապօրինություն։
Բայց վստահ ենք. տեսնում եք՝ մեր նկատմամբ կիրառվող բոլոր ապօրինությունները։ Իրենք ուրիշ ձև չունեն, 25 տոկոս ռեյտին ունենալով չեն կարող իշխանություն ունենալ Հայաստանում»։ Խոսելով հնարավոր դաշինքների մասին՝ Կարապետյանը նշեց, որ բանակցություններ են ունեցել բազմաթիվ քաղաքական ուժերի, այդ թվում՝ Հայ ազգային կոնգրեսի հետ, սակայն օրակարգերի որոշ տարբերությունների պատճառով համագործակցությունը չի ստացվել։
«Լևոն Տեր-Պետրոսյանը փորձառու քաղաքական գործիչ է և, ճանաչելով Փաշինյանին, ունի իր անհանգստությունները», ասաց նա՝ հավելելով, որ իրենք գնում են «բացարձակ հաղթանակի» և վստահ են, որ «կստանան հաղթողի մանդատը» ու կձևավորեն կառավարություն։ Անցյալում Հայ ազգային կոնգրեսի՝ Կարապետյանի առաջնորդած ուժի հետ դաշինք կազմելու ջանքերը ձախողվել էին։
Չնայած տապալված բանակցություններին, առաջին նախագահ Լևոն Տեր-Պետրոսյանի ղեկավարած ուժը հայտարարել է, որ պատրաստ է համագործակցել «Ուժեղ Հայաստանի» և այլ ընդդիմադիր կուսակցությունների հետ թե՛ նախընտրական, թե՛ հետընտրական փուլերում՝ խորհրդարանում կոալիցիա կազմելու և «երկիրը վերահաս սպառնալիքներից փրկելու գործում»։
Արտաքին քաղաքական հարցերում Կարապետյանը շեշտեց, որ պատրաստվում են լավ հարաբերություններ կառուցել բոլոր այն երկրների հետ, որոնցից օգտակար կլինի Հայաստանին։ ԵՄ-ի մասին խոսելիս նա նշեց, որ այնտեղ կա սփյուռք, և «պարտավոր ենք այդ երկրների հետ ունենալ լավ հարաբերություններ, որոնք թույլ կտան, որ մարդիկ այնտեղ նորմալ ապրեն», ընդգծելով, որ ցանկացած սխալ վարքագիծ երկրի ղեկավարի կողմից «սփյուռքի վրա անդրադառնում է շատ թանկ»։
Ռուսաստանին անդրադառնալով՝ ասաց. «Ես չեմ համարում ՌԴ-ին մեզ թշնամի, բայց ինձ կարևոր է Հայաստանի շահը»։ Նրա խոսքով՝ «Թուրքիայի հետ ունենալու ենք նորմալ հարաբերություններ, բայց ՀՀ շահերից ելնելով»։ Կարապետյանը հաստատեց, որ իր քաղաքական նպատակն է ընտրություններից հետո ձգտել կառավարություն ձևավորել։
Նա պնդեց, որ պայքարը պիտի մղեն «օրինական ճանապարհով»՝ չթույլատրելով խախտումներ, և շարունակեց վստահեցնել, որ արդյունքը, ըստ իրենց, լինելու է հաղթանակը: