Մելոնի. Իտալիա–Ադրբեջան գործընկերությունը կարևոր է այս բարդ ժամանակաշրջանում
Իտալիայի վարչապետ Ջորջիա Մելոնին Ադրբեջան կատարած իր այցի վերաբերյալ գրառմամբ նշել է, որ Իտալիա–Ադրբեջան ռազմավարական գործընկերությունը կարևոր է «այս բարդ համաշխարհային զարգացումների ժամանակաշրջանում» և ավելացրել, որ Բաքու է ժամանել այդ գործընկերությունն ամրապնդելու համար, ըստ ադրբեջանական APA-ի։
Նրա խոսքով՝ այս գործընկերությունն ունի կոնկրետ և երկարաժամկետ նշանակություն Իտալիայի համար։ Մելոնին ընդգծել է, որ կողմերը մտադիր են ավելի խորացնել համագործակցությունը էներգետիկայի, անվտանգության, տրանսպորտի և լոգիստիկայի, ներդրումների և քաղաքական երկխոսության ոլորտներում՝ այն աստիճանաբար վերածելով երկու երկրների համար «կոնկրետ հնարավորությունների»։
«Հուսալի գործընկերությունները հատկապես կարևոր են բարդ համաշխարհային զարգացումների շրջանում»,— գրել է նա՝ հավելելով, որ Իտալիայի և Ադրբեջանի միջև հարաբերությունները հենց այդպիսի գործընկերություն են։ Մելոնին այս գնահատականները տվել է Ադրբեջան կատարած իր այցելության վերաբերյալ հրապարակմամբ՝ շեշտելով գործընկերության խորացման նպատակադրումը։