Մալիում կրկին համակարգված հարձակումներ. պայթյուններ Բամակոյում և մի քանի քաղաքներում
Մալիում կրկին սրվել է իրավիճակը. պայթյունների ձայներ են լսվել մայրաքաղաք Բամակոյում, ինչպես նաև երկրի ներքին շրջանների մի շարք բնակավայրերում։ Բանակը հայտնել է, որ տարբեր խմբեր սկսել են համակարգված հարձակումներ՝ միաժամանակ մի քանի ուղղություններով։ Ականատեսը Reuters-ին պատմել է, որ մայրաքաղաքի ռազմաբազայի մոտ զինվորներ են տեղակայվել՝ տարածքում ճանապարհները փակելու նպատակով։
Մոտավորապես նույն ժամանակահատվածում նմանատիպ անկարգություններ են արձանագրվել կենտրոնական Սևարե քաղաքում, ինչպես նաև հյուսիսում գտնվող Քիդալում և Գաոում։ Մալին շարունակում է պայքարել «Ալ Քաիդայի» և «Իսլամական պետության» Արևմտյան Աֆրիկայի ստորաբաժանումների հետ կապված ապստամբությունների դեմ։
Բացի այդ, երկրի հյուսիսում երկարատև բնույթ կրող, տուարեգների գլխավորած ապստամբությունը շարունակում է մարտահրավեր լինել իշխանությունների համար։ Բանակի հայտարարությամբ՝ մարտական գործողությունները շարունակվում են, և բնակչությանը կոչ է արվում պահպանել հանգստություն։
Մալիի ռազմական ղեկավարները իշխանության են եկել 2020 և 2021 թվականների պետական հեղաշրջումներից հետո՝ խոստանալով վերականգնել անվտանգությունը, սակայն զինյալների հարձակումները բանակի և քաղաքացիական անձանց վրա շարունակում են կրկնվել։