«Հայաստանը ծայրագավառ չի լինելու». Ալեն Սիմոնյանը մեկնաբանեց հայ-բելառուսական հարաբերությունները
«Հայաստանը ծայրագավառ չի լինելու, Հայաստանը չի լինելու քաղաքական կախվածության մեջ», այսօր լրագրողների հետ ճեպազրույցում հայտարարեց Հայաստանի Ազգային ժողովի նախագահ Ալեն Սիմոնյանը՝ մեկնաբանելով հայ-բելառուսական հարաբերությունների թեման։ Նրա խոսքով՝ Հայաստանի, ՀԱՊԿ-ում գործընկերոջ և պետականության նկատմամբ անհարգալից վերաբերմունքը, ինչպես նաև Ադրբեջանի հետ 44-օրյա պատերազմը նախապատրաստելը են վատացնում հարաբերությունները։
Սիմոնյանն ընդգծեց, որ յուրաքանչյուր պետության քաղաքական կուրսը իր ընտրության հարցն է. «ՀՀ-ի համար մարդու իրավունքները, ազատությունները կարևորագույն արժեքներ են, և կարծում եմ՝ ամեն պետություն իր օրինակն է ընտրում։ Մենք ընտրել ենք ՀՀ ժողովրդավարացման ճանապարհը, իրենք՝ մի քիչ այլ ճանապարհ են ընտրել»։
Թեմայի ֆոնին Մայիսի 5-ին Բելառուսի ԱԳՆ է կանչվել Բելառուսում ՀՀ գործերի ժամանակավոր հավատարմատար Արթուր Սարգսյանը։ Ըստ նախարարության հաղորդագրության՝ հայ դիվանագետին ներկայացվել է խիստ բողոք և հանձնվել համապատասխան նոտա՝ «կապված հայկական կողմի վերջին ոչ բարեկամական գործողությունների հետ»։
Ավելի վաղ ԱԺ նախագահը հայտարարել էր. «Հայաստանը չպետք է դառնա գուբերնիա և կառավարվի այնպես, ինչպես Բելառուսը»։ Վերադառնալով թեմային՝ Սիմոնյանը հավելեց, որ Բելառուսի կառավարման օրինակը իր երկրի համար և անձամբ իր համար անընդունելի է. «Հայաստանը ազատ երկիր է՝ իր ազատ մեդիաներով, մարդու իրավունքներով և օրենքի գերակայությամբ»։
Նրա գնահատմամբ, Հայաստանը շարունակելու է բարձրացնել իր քաղաքական ինքնիշխանության մակարդակը բոլոր ուղղություններով։