Կրակոցներ Երևանի Բագրատունյաց փողոցում. 44-ամյա տղամարդը հիվանդանոցում մահացել է
Այսօր ժամը 13:30-ի սահմաններում կրակոցներ են հնչել Երևանի Շենգավիթ վարչական շրջանի Բագրատունյաց 13 հասցեում։ Ֆոտոլրագրող Գագիկ Շամշյանի տեղեկություններով՝ դեպքի վայրից «Շենգավիթ» բժշկական կենտրոն տեղափոխված 40-ամյա տղամարդու կյանքը փրկել չի հաջողվել: Դեպքի վայրում Շամշյանն արնանման հետքեր է ֆիքսել: «Պացիենտը բժշկական կենտրոն է տեղափոխվել հարազատների կողմից՝ անգիտակից վիճակում, ծայրահեղ ծանր վիճակում՝ առանց կենսական կայուն ցուցանիշների։
Անմիջապես իրականացվել են անհրաժեշտ վերակենդանացման միջոցառումներ, սակայն, ցավոք, գիտակցության վերականգնում չի արձանագրվել, և գրանցվել է կենսաբանական մահ», - «Ազատությանը» փոխանցեցին «Շենգավիթ» ԲԿ-ից: «Ազատության» տեղեկություններով՝ տղամարդը 44 տարեկան էր, մահացու հրազենային վնասվածքը հասցվել է սրտի հատվածում։
Միջադեպի բուն պատճառն առայժմ հայտնի չէ: Ներքին գործերի նախարարությունից «Ազատությանը» հայտնեցին՝ ձեռնարկվում են անհրաժեշտ միջոցառումներ՝ դեպքի բոլոր հանգամանքները պարզելու և հանցագործությունը կատարած անձին հայտնաբերելու ուղղությամբ: Քննչական կոմիտեից էլ ասացին, որ դեպքի առթիվ նախաձեռնվել է քրեական վարույթ՝ սպանության հատկանիշներով (Քրեական օրենսգրքի 155-րդ հոդվածի 1-ին մասով): Նախաքննությունը շարունակվում է։