Կուբայի ԱԳ նախարարը հայտարարում է՝ նավթի բոլոր մատակարարները ենթարկվում են ԱՄՆ սպառնալիքների
Կուբայի արտաքին գործերի նախարար Բրունո Ռոդրիգես Պարիլյանը հայտարարել է, որ երկրի նավթի մատակարարները ենթարկվում են ԱՄՆ-ի «ահաբեկումների և սպառնալիքների», ինչը, նրա խոսքով, խախտում է ազատ առևտրի և նավագնացության ազատության սկզբունքները։ Նա հավելել է, որ վերջին չորս ամսում Կուբան ստացել է միայն մեկ վառելիքային խմբաքանակ։
«Չորս ամսվա ընթացքում Կուբան ստացել է միայն մեկ խմբաքանակ վառելիք։ Մեր բոլոր մատակարարները ենթարկվում են ահաբեկումների և սպառնալիքների, ինչը խախտում է ազատ առևտրի և նավագնացության ազատության սկզբունքները», գրել է նախարարը իր Telegram ալիքում։ Պարիլյանը «սուտ» է որակել Սպիտակ տանը ճեպազրույցի ժամանակ ԱՄՆ պետքարտուղար Մարկո Ռուբիոյի արած պնդումը, թե Կուբայի նկատմամբ «ոչ մի նավթային շրջափակում չկա»։
«Մի քանի ժամ առաջ (ԱՄՆ) պետքարտուղարը հայտարարեց, թե Կուբայի դեմ ոչ մի նավթային շրջափակում չկա։ Նա պարզապես որոշել է ստել։ Նա հակասում է նախագահին և Սպիտակ տան մամուլի քարտուղարին», նշել է Կուբայի ԱԳ ղեկավարը։ Կարիբյան հանրապետության արտաքին քաղաքական գերատեսչության ղեկավարի այդ հայտարարությունները հնչել են Սպիտակ տան մակարդակով արված մեկնաբանություններից հետո և ներկայացնում են Հավանայի գնահատականը ԱՄՆ-ի հասցեագրված պնդումներին։