Կասկածյալը հայտնել է՝ նպատակ ուներ կրակել Թրամփի վարչակազմի պաշտոնյաների վրա՝ CBS News
Վաշինգտոնում նախագահ Դոնալդ Թրամփի մասնակցությամբ միջոցառման հետ կապված ենթադրյալ կրակոցների գործով ձերբակալված տղամարդը իրավապահներին հայտնել է, որ նպատակ ուներ կրակել նրա վարչակազմի պաշտոնյաների վրա, փոխանցում է CBS News-ը՝ հղում անելով երկու աղբյուրի։ Իրավապահ մարմինների տվյալներով կասկածյալը մոտ 31 տարեկան, Լոս Անջելեսի բնակիչ Քոուլ Թոմաս Ալենն է։
Սոցիալական ցանցերում տարածված տեղեկությունների համաձայն՝ նա նախկինում ուսուցիչ է եղել Կալիֆոռնիայի Տորանս քաղաքում՝ Լոս Անջելեսի մերձակայքում։ Վաշինգտոնի ոստիկանության ժամանակավոր պետ Ջեֆրի Քերոլի խոսքով՝ Ալենը զինված է եղել որսորդական հրացանով, ինքնաձիգով և մի քանի դանակներով։
Նա տեղափոխվել է տեղական հիվանդանոց հետազոտության համար։ Նրա դրդապատճառների մասին խոսելը դեռ վաղ է։ Սա առաջին անգամն էր, որ Թրամփը մասնակցում էր համապատասխան միջոցառմանը որպես նախագահ. նախորդ տարիներին նա բոյկոտում էր։ Reuters-ը նշում է, որ ընթրիքն անցկացվել է այն նույն վայրում, որտեղ իրականացվել էր նախագահ Ռոնալդ Ռեյգանի դեմ մահափորձը։
Կադրերում երևում է, թե ինչպես է կասկածյալը արագ անցնում անցակետով՝ մի պահ անակնկալի բերելով անվտանգության աշխատակիցներին, մինչև նրանք հասցնում են խլել զենքը։