Կանադայի վարչապետ Մարկ Քարնին Երևանում կմասնակցի Եվրոպական քաղաքական համայնքի գագաթնաժողովին
Հաջորդ շաբաթ Կանադայի վարչապետ Մարկ Քարնին կժամանի Հայաստան՝ մասնակցելու Եվրոպական քաղաքական համայնքի գագաթնաժողովին, տեղեկացնում է Եվրահանձնաժողովը։ Քարնին կլինի ձևաչափի ստեղծումից ի վեր առաջին ոչ եվրոպացի առաջնորդը, ով որպես հյուր կմասնակցի այս հավաքին։ Պաշտոնական հաղորդագրության համաձայն, գագաթնաժողովը կանցնի «Կառուցելով ապագան.
միասնություն և կայունություն Եվրոպայում» կարգախոսի ներքո։ Երևանի քննարկումները նախատեսվում է կենտրոնացնել ժողովրդավարության դիմադրողականության ամրապնդման, հաղորդակցությունների զարգացման, ինչպես նաև տնտեսական ու էներգետիկ անվտանգության թեմաների շուրջ։ Եվրահանձնաժողովը նշել է, որ մասնակիցները կքննարկեն՝ ինչպես ավելի սերտ համագործակցությամբ և համակարգված քայլերով նպաստել ավելի դիմացկուն, անվտանգ և միասնական եվրոպական տարածքի ձևավորմանը։
Գագաթնաժողովին հրավիրված են ԵՄ անդամ 27 երկրները, ինչպես նաև գործընկեր պետություններ, այդ թվում՝ Ադրբեջանը և Թուրքիան։ Հայաստանի փոխարտգործնախարար Վահան Կոստանյանը նախորդ շաբաթ հայտարարեց, որ առայժմ ո՛չ Բաքվից, ո՛չ Անկարայից արձագանք չի ստացվել Երևանի ուղարկած հրավերներին։
Եվրոպական քաղաքական համայնքի հանդիպումները մեկնարկել են 2022 թվականին՝ Ռուսաստանի կողմից Ուկրաինա իրականացված լայնածավալ ներխուժումից հետո։ Դրանք անցկացվում են տարին երկու անգամ՝ ԵՄ անդամ և ոչ անդամ երկրներում, նպատակ ունենալով ամրապնդել եվրոպական մայրցամաքի անվտանգությունը, կայունությունը և բարգավաճումը, ինչպես նաև քննարկել փոխադարձ հետաքրքրության հարցեր։
Մինչ այս գագաթնաժողովները հյուրընկալել են Չեխիան, Մոլդովան և Ալբանիան, իսկ հաջորդ հանդիպումը, Երևանի արտահերթ նստաշրջանից հետո, նախատեսված է Իռլանդիայում այս տարվա նոյեմբերին։