Լիբանանում 24 ժամում զոհերի թիվը հասել է 41-ի՝ առողջապահության նախարարության տվյալներով
Լիբանանի հարավը նոր հարվածների է ենթարկվել. Իսրայելի գործողություններից հետո հաղորդվում է առնվազն 10 զոհի մասին, իսկ Լիբանանի առողջապահության նախարարությունը հայտնում է, որ վերջին 24 ժամում գրանցված զոհերի թիվը հասել է 41-ի՝ այս փուլում ամենաբարձր ցուցանիշը։ Ազգային լրատվական գործակալության տվյալներով՝ Նաբաթիեի շրջանի Շուքին քաղաքում երեք մարդ է զոհվել։
Մեկ այլ հարվածի թիրախում Կֆար Դաջալ գյուղի մեքենաներից մեկն էր, ինչի հետևանքով զոհվել են երկուսը։ Լվայզե գյուղում բնակելի տան վրա հասցված հարվածը խլել է ևս երեք մարդու կյանք։ Առողջապահական գերատեսչության՝ ընդհանուր հաշվարկով, մարտի 2-ից ի վեր երկրում 2,659 մարդ է զոհվել, 8,183-ը վիրավորվել։
Իսրայելի զինված ուժերը ավելի վաղ հայտարարեցին, որ Իրանի աջակցությունը վայելող «Հեզբոլա» խմբավորման՝ «հրադադարի համաձայնագրի խախտումներից» հետո «ուժգին» կգործեն «Հեզբոլա»-ի դեմ և կոչ արեցին բնակիչներին տարհանվել։
Նշվում է, որ Լիբանանը ներքաշվել է Մերձավոր Արևելքի պատերազմին մարտի 2-ին, երբ Արևմուտքի կողմից ահաբեկչական ճանաչված «Հեզբոլա»-ն հարձակվեց Իսրայելի վրա՝ ի պատասխան ԱՄՆ-ի և Իսրայելի ավիահարվածների հետևանքով Իրանի գերագույն առաջնորդ այաթոլլա Ալի Խամենեիի սպանության։
Այդ հարձակումը հանգեցրեց Իսրայելի նոր ցամաքային ու օդային գործողություններին։ Սպիտակ տանը ԱՄՆ նախագահ Դոնալդ Թրամփի միջնորդությամբ ապրիլի 23-ին կայացած հանդիպման ժամանակ, ըստ հրապարակված տեղեկությունների, Իսրայելն ու Լիբանանը երեք շաբաթով երկարաձգեցին 10-օրյա հրադադարը, սակայն այն խախտվում է.
կողմերը իրար են մեղադրում նախահարձակ լինելու մեջ։