Իրանն առաջարկել է Հորմուզի նեղուցում այլընտրանքային երթուղիներ՝ ականներից խուսափելու համար
Իրանն առաջարկել է նավերին օգտվել Հորմուզի նեղուցում նախատեսված այլընտրանքային երթուղիներից՝ հնարավոր ծովային ականներից խուսափելու համար: Այդ մասին, իրանական լրատվամիջոցների փոխանցմամբ, նշվում է Իսլամական հեղափոխության պահապանների կորպուսի (ԻՀՊԿ) հայտարարությունում.
«Հորմուզի նեղուցով անցնելու մտադրություն ունեցող բոլոր նավերին տեղեկացնում ենք, որ ծովային անվտանգության սկզբունքներին համապատասխանելու և ծովային ականների հետ հնարավոր բախումներից պաշտպանվելու համար նրանք պետք է ընտրեն այլընտրանքային նավագնացության ուղիներ Հորմուզի նեղուցում»,— ասված է հաղորդագրությունում: ISNA-ն և Tasnim-ը հրապարակել են քարտեզ, որտեղ նեղուցի կենտրոնական մասում նշված է «վտանգավոր գոտի»՝ մեծ շրջանաձև սահմանմամբ: Ենթադրաբար, այդ հատվածում ծովային ականներ են տեղակայված ԻՀՊԿ-ի կողմից: ԻՀՊԿ-ի ռազմածովային ուժերը ներկայացրել են նաև այլընտրանքային երթուղիների քարտեզ, որը, ըստ տեղեկատվության, նախատեսված է նավերին օգնելու ականներից խուսափել: Առևտրային նավերին խորհուրդ է տրվում հետևել անվտանգ ուղուն, որը ձգվում է նեղուցի հյուսիսային հատվածում՝ Իրանի ափերին հարակից: Պարսից ծոցից դուրս եկող նավերը պետք է անցնեն իրանական Լարակ կղզու հարավային ափով, իսկ Պարսից ծոց մտնողները՝ դրա հյուսիսով.
Հրապարակված հանձնարարականները ձևակերպված են որպես նավագնացական անվտանգության միջոցառում՝ նեղուցով անցնող նավերի համար ռիսկերը նվազեցնելու նպատակով: