Թրամփը՝ Իրանի հետ բանակցությունների մասին. «Շատ լավ են ընթանում», հրադադարը շարունակում է գործել
Ամերիկա-իրանական լարվածության նոր սրացումից հետո՝ երբ կողմերը գիշերը միմյանց վրա կրակել էին Հորմուզի նեղուցում, ԱՄՆ նախագահ Դոնալդ Թրամփը հայտարարեց, որ Վաշինգտոնը բանակցում է Թեհրանի հետ և հրադադարը դեռ ուժի մեջ է։ Նա կրկին զգուշացրեց, որ եթե Իրանը համաձայնության չգա, կբախվի «լուրջ հետևանքների»։
«Եվ նրանք պետք է արագ ստորագրեն այդ համաձայնագիրը։ Բանակցությունները շատ լավ են ընթանում։ Բայց նրանք պետք է հասկանան, որ եթե այն չստորագրվի, շատ դժվարություններ կունենան… Ասեմ ձեզ, որ նրանք շատ ավելի են ուզում ստորագրել այն, քան ես», — ասաց Թրամփը։
Իրանի բարձրագույն ռազմական հրամանատարությունը պնդեց, որ ԱՄՆ-ը թիրախավորել է Հորմուզի նեղուցին մոտեցող իրանական նավթատարը և մեկ այլ նավ, ինչպես նաև «օդային հարձակումներ» իրականացրել մի շարք ափամերձ տարածքների վրա։ Մինչդեռ ԱՄՆ-ը հայտարարեց, որ գործել է ինքնապաշտպանության շրջանակում և պատասխանել է նեղուցում ամերիկյան ռազմանավերի վրա Իրանի հարձակումներին։
Փոխադարձ մեղադրանքների ֆոնին Թրամփը ընդգծում է, որ բանակցությունները շարունակվում են և հրադադարը մնում է ուժի մեջ, սակայն նա նաև հստակ ազդակ ուղարկեց, որ առանց համաձայնության Թեհրանին սպասում են դժվարություններ։