Թրամփը. «Իրանը չի կարող մեզ շանտաժի ենթարկել»՝ Հորմուզի նեղուցի շուրջ
ԱՄՆ նախագահ Դոնալդ Թրամփը նախօրեին հայտարարեց, որ Իրանը չի կարող «շանտաժի ենթարկել» Միացյալ Նահանգներին՝ արձագանքելով Թեհրանի որոշմանը կրկին փակել Հորմուզի նեղուցը, որը համարվում է համաշխարհային էներգետիկ մատակարարումների կարևորագույն ուղի։ Օվալաձև աշխատասենյակում ելույթ ունենալով՝ Թրամփը նշեց, որ Իրանը «ոչ նավատորմ ունի, ոչ օդուժ, ոչ ղեկավարներ» և հավելեց.
«Ղեկավարների մասով այնտեղ ռեժիմի փոփոխություն է տեղի ունեցել։ Դա ռեժիմի պարտադրված փոփոխություն է կոչվում»։ Նրա խոսքով, Թեհրանը նորից փորձել է փակել նեղուցը «ինչպես արել է տարիներ շարունակ», սակայն «չի կարող» ԱՄՆ-ին շանտաժի ենթարկել։ Նախագահը նաև ասաց, որ «խոսում են» Թեհրանի հետ։
«47 տարվա մեջ ամերիկյան որևէ վարչակազմ դեմ դիմաց չէր կանգնել Իրանի հետ, իսկ մենք արեցինք դա։ Շատ լավ խոսակցություններ են ընթանում։ Կոշտ դիրք ենք ընդունել։ Նրանք շատ մարդ են սպանել, մեր զինվորներից շատերին»,— հայտարարեց Թրամփը։ Իրանի կողմից ԱՄՆ-ի հետ գլխավոր բանակցող համարվող Մոհամմադ Բաղեր Ղալիբաֆը այսօր հայտարարեց, որ Հորմուզի նեղուցը կշարունակի փակ մնալ։
«Անհնար է, որ ուրիշներն անցնեն Հորմուզի նեղուցով, այն դեպքում, որ մենք չենք կարող անցնել»,— ասաց նա իրանական հեռուստաեթերում։ Հիշեցնենք, որ ապրիլի 12-ին Թրամփը հայտարարել էր նեղուցը շրջափակելու մասին։ Թեհրանի հետ կապ ունեցող խոսակցությունների մասին նրա ակնարկները շարունակվում են կոշտ հռետորաբանության ֆոնին, մինչդեռ պաշտոնական հայտարարությունները կողմերից մատնանշում են, որ Հորմուզի շուրջ լարվածությունը դեռ մնում է բարձր։