Թբիլիսիում քննարկվել է փողոց Շառլ Ազնավուրի անունով անվանակոչելու հարցը

Վրաստանում Հայաստանի դեսպան Աշոտ Սմբատյանն ու Վրաստանում Ֆրանսիայի դեսպան Օլիվյե Կուրտոն հանդիպել են Թբիլիսիի քաղաքային խորհրդի նախագահ Զուրաբ Աբաշիձեի հետ՝ քննարկելով մայրաքաղաքում փողոց Շառլ Ազնավուրի անունով անվանակոչելու հնարավորությունը։ Այս մասին հաղորդել է դեսպանությունը։

Հանդիպմանը մասնակցել են նաև քաղխորհրդի անդամներ Միխեիլ Ռեխվիաշվիլին և Մամուկա Բալիաշվիլին։ Դեսպանները շեշտել են Հայաստանի և Ֆրանսիայի երկրների սերտ կապերի կարևորությունը Վրաստանի հետ, ինչը, ըստ հաղորդագրության, արտահայտվում է Թբիլիսիի հետ համագործակցության մեջ և միտված է երեք ժողովուրդների պատմական կապերի ու ավանդական բարեկամության զարգացմանը։

Զրուցակիցները հույս են հայտնել, որ առկա սերտ համագործակցությունը առաջիկայում ևս կխորանա։ Հանդիպման ընթացքում բարձրացվել է նաև առաջարկը՝ Թբիլիսիի փողոցներից մեկը անվանակոչել աշխարհահռչակ շանսոնյե, հայկական ծագումով, Վրաստանի հետ արմատներով կապված ֆրանսիացի երգիչ Շառլ Ազնավուրի անունով։

Զուրաբ Աբաշիձեն հայտնել է, որ քաղաքային խորհրդի համապատասխան հանձնաժողովը պատրաստ է քննարկել այս հարցը։ Առաջարկը ներկայում քննարկման փուլում է, և ըստ հաղորդագրության, որևէ որոշում չի հայտարարվել։