Ընտրակաշառքի գործով «Ուժեղ Հայաստան»-ի թիմակից Արթուր Ավանեսյանը երկու ամսով կալանավորվեց

Հակակոռուպցիոն կոմիտեն երկու ամսով կալանավորել է «Ուժեղ Հայաստան» կուսակցության անվտանգության հարցերով թիմի ղեկավար, արցախյան պատերազմների մասնակից, «Կանդազ» մականունով հայտնի նախկին հետախույզ Արթուր Ավանեսյանին։ Նախօրեին հաղորդվել էր, որ Ավանեսյանը նախ ձերբակալվել է, ապա նրա նկատմամբ մեղադրանք է առաջադրվել ընտրակաշառքի հոդվածով։

Ընդդիմադիր «Ուժեղ Հայաստան»-ի թիմակիցը ներկայում գտնվում է կալանքի տակ երկու ամսով։ Քննչական մարմինը պնդում է, թե ունի տվյալներ, ըստ որոնց գործարար Սամվել Կարապետյանի առաջնորդած քաղաքական ուժի համակիրը ընտրողներին խոստացել է աշխատանքի ընդունել՝ իրենց օգտին քվեարկելու դիմաց։

Կուսակցությունից հայտնում են, որ Արթուր Ավանեսյանը մեղքը չի ընդունում։