Էրդողանը ապրիլքսանչորսյան ուղերձում կրկին չհիշատակեց «ցեղասպանություն» եզրույթը

Թուրքիայի նախագահ Ռեջեփ Թայիփ Էրդողանը այս տարվա ապրիլքսանչորսյան ուղերձում կրկին չօգտագործեց «ցեղասպանություն» եզրույթը՝ նշելով, թե Օսմանյան կայսրության հայերը կյանքից զրկվել են Առաջին համաշխարհային պատերազմի դժվարին պայմաններում։

Թուրքիայի Հայոց պատրիարք Սահակ Մաշալյանին հղած ցավակցական նամակում Էրդողանը գրել է, որ Օսմանյան կայսրության փլուզումը ուղեկցվել է բախումներով, հրոսակախմբերի շարժումներով, ահաբեկչություններով և համաճարակներով, որոնց ընթացքում, ի թիվս այլ ժողովուրդների, նաև հայերն են խորը ցավեր կրել։

Նա շեշտել է. «Բախումի փոխարեն նախընտրում ենք համաձայնությունը»։ Էրդողանի ուղերձը ընթերցվել է Ստամբուլի հայկական եկեղեցում մատուցված պատարագի ընթացքում։ Ուղերձում նա չի անդրադարձել Հայաստան–Թուրքիա կարգավորման գործընթացին։ Թուրքիայի ղեկավարը նաև նշել է.

«Խաղաղության, բարօրության, եղբայրության հիման վրա ավելի ցանկալի օրերի հասնելու առաջարկությամբ շարունակում ենք բոլոր հայրենակիցների և բարեկամների հետ միասնաբար գործել և պայքարել՝ նկատի չունենալով նրանց ազգային և կրոնական պատկանելությունները»։ Պաշտոնական Անկարան շարունակում է ժխտել և չի ընդունում Հայոց ցեղասպանության իրողությունը։