Գազայում սպանվել է Համասի առաջնորդ Խալիլ ալ-Հայայի որդին, Իսրայելն ստուգում է տեղեկությունները
Համասի առաջնորդ Խալիլ ալ-Հայայի որդին սպանվել է Գազայի հատվածում Իսրայելի կողմից իրականացված օդային հարվածի հետևանքով։ Իսրայելի բանակի խոսնակը հայտարարել է, որ այս տեղեկությունները ստուգվում են։ Ըստ տեղական աղբյուրների՝ ալ-Հայայի որդին՝ Ազզամ Խալիլ ալ-Հայան, երեկ վիրավորում է ստացել Ջաբալիա փախստականների ճամբարում՝ անօդաչու թռչող սարքի հարվածի հետևանքով։
Հիվանդանոցի հաղորդագրությունների համաձայն՝ հարձակման ընթացքում սպանվել է նաև պաղեստինյան զինյալ խմբավորման մեկ այլ անդամ։ Խալիլ ալ-Հայան համարվում է Համասի ամենաբարձրաստիճան պաշտոնյաներից մեկը և այն բանագնացներից, ովքեր մասնակցում էին Գազայի հատվածում կայուն խաղաղության հաստատման շուրջ հանդիպումներին։
Համասի խոսնակ Հասեմ Կասեմը dpa-ին հայտնել է, որ սա ալ-Հայայի չորրորդ որդին է, որը սպանվել է Իսրայելի կողմից իրականացված հարձակման հետևանքով։