Բաքուն կանչել է ԵՄ դեսպանին և բողոքի նոտա ներկայացրել. լրատվամիջոցները հայտնում են կապերի դադարեցման մասին
Ադրբեջանում Եվրամիության դեսպան Մարիանա Կույունջիչը այսօր կանչվել է արտաքին գործերի նախարարություն։ Ըստ ադրբեջանական ԱՊԱ գործակալության՝ Բաքուն խստորեն դատապարտել է Եվրախորհրդարանի երեկ ընդունած բանաձևի «անհիմն և կողմնակալ դրույթները» և դեսպանին ներկայացրել բողոքի նոտա։
Նախօրեին Եվրոպական խորհրդարանը «Աջակցություն Հայաստանում ժողովրդավարական դիմակայունությանը» բանաձևով վերահաստատեց իր աջակցությունը Լեռնային Ղարաբաղի հայերի իրավունքներին՝ ներառյալ նրանց ինքնության, սեփականության և մշակութային ժառանգության պաշտպանությունը, ինչպես նաև նրանց անվտանգ, անխոչընդոտ և արժանապատիվ վերադարձի իրավունքը՝ համապատասխան միջազգային երաշխիքների ներքո։
Միևնույն ժամանակ, ադրբեջանական լրատվամիջոցները հայտնում են, որ որոշվել է դադարեցնել Միլի մեջլիսի կապերը Եվրախորհրդարանի հետ։