«Արմավիր» ՔԿՀ կարճատև տեսակցության ժամին քաղաքացու մոտ հայտնաբերվել է թմրամիջոցի նմանվող զանգված
Արդարադատության նախարարության «Արմավիր» քրեակատարողական հիմնարկում կարճատև տեսակցության գնացած քաղաքացու մոտ իրականացված խուզարկությամբ հայտնաբերվել է փաթեթ, որի մեջ կար թմրամիջոցի նմանվող բուսական զանգված՝ ընդհանուր 1 գրամ քաշով։ Այս մասին հաղորդում է Քրեակատարողական ծառայությունը։
ՔԿՀ անվտանգության և պահպանության ապահովման բաժինների ծառայողները քաղաքացին խուզարկելիս զանգվածը հայտնաբերել են նրա բաճկոնի ներսի գրպանում։ Քաղաքացին ձերբակալվել է Քրեակատարողական ծառայության կենտրոնական մարմնի օպերատիվ վարչության «Արմավիր» տարածքային բաժնի ծառայողների կողմից և հայտնաբերված զանգվածի հետ միասին ներկայացվել է ՀՀ Քննչական կոմիտեի Արմավիրի մարզային քննչական վարչության Վաղարշապատի քննչական բաժին։
Քրեակատարողական ծառայության հաղորդագրության համաձայն, դեպքի նյութերը փոխանցվել են քննիչներին գնահատականի և հետագա ընթացակարգերի համար։