Արաղչին կարճատև վերադարձել է Իսլամաբադ՝ սպասվող բանակցությունների երկրորդ փուլի անորոշությունից հետո
Իրանի արտաքին գործերի նախարարը կիրակի օրը կարճատև այցով կրկին ժամանել է Իսլամաբադ։ Իրանական պետական լրատվամիջոցների հաղորդմամբ, Աբբաս Արաղչին նախորդ օրն ուշ երեկոյան լքել էր Պակիստանի մայրաքաղաքը՝ անորոշություն ստեղծելով սպասվող բանակցությունների երկրորդ փուլի շուրջ, սակայն կիրակի վերադարձել է այնտեղ՝ նախքան Մոսկվա մեկնելը։
Մինչ այդ Արաղչին եղել էր Օմանում, որը նախկինում հանդես է եկել որպես միջնորդ և տեղակայված է ռազմավարական նշանակության Հորմուզի նեղուցի մյուս կողմում։ Անցյալ շաբաթ Սպիտակ տունը հայտնել էր, որ պատրաստվում է բանագնացներ Սթիվ Ուիթքոֆին և Ջարեդ Քուշներին ուղարկել Իսլամաբադ՝ շարունակելու այս ամսվա սկզբին կայացած պատմական առերես բանակցությունները։
Սակայն շաբաթ օրը՝ Արաղչիի մեկնումից անմիջապես հետո, Դոնալդ Թրամփը հայտարարեց, որ առաքելությունը չեղարկել է Իրանի հետ հարաբերություններում առաջընթացի բացակայության պատճառով։ «Եթե նրանք ցանկանում են, մենք կարող ենք խոսել, բայց մարդիկ չենք ուղարկելու», — ասել է նա կիրակի օրը Fox News-ին տված հարցազրույցում։
Ավելի վաղ նա սոցիալական հարթակներում գրել էր. «Նրանցից պահանջվում է ընդամենը զանգահարել»։ Պակիստանցի երկու պաշտոնյա, անանուն մնալու պայմանով, հայտնել է, որ կողմերի միջև անուղղակի բանակցությունները շարունակվում են։