Արաղչին Թեհրանում ընդունել է Ասիմ Մունիրին. այցը՝ ԱՄՆ ուղերձ փոխանցելու նպատակով, ըստ Press TV-ի
Իրանի արտաքին գործերի նախարար Աբբաս Արաղչին Թեհանում ընդունել է Պակիստանի բանակի շտաբի պետ Ասիմ Մունիրին և նրա գլխավորած պատվիրակությանը։ Իրանական Press TV-ի տեղեկությամբ՝ այցի նպատակն ԱՄՆ ուղերձը փոխանցելն էր Իրանի ղեկավարությանը և հնարավոր բանակցությունների հաջորդ փուլի պլանավորումը։
Արաղչին ապրիլի 15-ի երեկոյան X հարթակում հրապարակած գրառմամբ և տեսանյութով շնորհակալություն է հայտնել Պակիստանին երկխոսությունը բարեհաճորեն հյուրընկալելու համար՝ ընդգծելով, որ դա արտացոլում է երկու երկրների «խորը և հրաշալի» հարաբերությունները։ Նա նշել է, որ Իրանի և Պակիստանի հանձնառությունը տարածաշրջանում խաղաղությունն ու կայունությունը խթանելու հարցում «մնում է ամուր և համատեղ»։
Միաժամանակ Tasnim գործակալությունը հաղորդում է, որ Իրանը պաշտոնական գնահատում կկատարի՝ որոշելու, թե արդյոք կմասնակցի ԱՄՆ-ի հետ բանակցությունների հաջորդ փուլին։ Գործակալությանը փոխանցած իրազեկ աղբյուրի խոսքով՝ պակիստանյան պատվիրակության և իրանցի պաշտոնյաների հանդիպումից հետո իրանական թիմը կանցկացնի անհրաժեշտ վերլուծություն, ինչից հետո կկայացվի որոշում Իրանի և ԱՄՆ-ի միջև բանակցությունների հաջորդ փուլի վերաբերյալ։
Այս պահին գործընթացի հետագա քայլերը կախված են Թեհրանի գնահատականներից, մինչդեռ Իրանի արտաքին գործերի ղեկավարը շեշտում է, որ տարածաշրջանային կայունության մտադրությունները մնում են անփոփոխ։